Размер шрифта: A A A
Цвет сайта: A A A A
Non: olmali, qovoqli, qalampirli...
12 Oct 2017
Yurtimizda nonning turi ko‘p. Endi meva-sabzavotlar qo‘shilgan non mahsulotlari ham aholi dasturxoniga fayz kiritadi.

Tizimda amalga oshirilayotgan bu kabi yangiliklar haqida "O‘zdonmahsulot" aksiyadorlik kompaniyasi va Toshkent kimyo- texnologiya instituti hamkorligida o‘tkazilgan davra suhbatida so‘z yuritildi.

Professor-o‘qituvchilar, yosh olimlar, talabalar ishtirok etgan yig‘ilishda yaratilayotgan istiqbolli navlar, g‘alla yetishtirishdan manfaatdorlik ortishi, moddiy-texnik bazaning mustahkamlanishi hamda bu ishlarning davlatimiz tomonidan qo‘llab-quvvatlanayotgani alohida ta’kidlandi.

2010-2017-yillarda ishlab chiqarish quvvatlarini modernizatsiya qilish va yangilarini ishga tushirish maqsadida 233 investitsiya loyihasi amalga oshirildi. Ko‘plab tegirmon, omixta yem, urug‘lik va non sexlariga zamonaviy texnologik uskunalar joriy qilindi. Ishlab chiqarish jarayonida elektr energiyasi sarfini 15-20 foizga kamaytirishga erishildi. Qariyb 1 ming 800 ish o‘rni yaratildi.

Yaratilgan ish o‘rinlari asosan yoshlar hisobiga to‘g‘ri kelayotgani esa yanada quvonarli. Kompaniyada O‘zbekiston yoshlar ittifoqi bilan hamkorlikda "O‘zdonmahsulot" aksiyadorlik kompaniyasi tizimida yoshlarga oid davlat siyosatini amalga oshirish yuzasidan chora-tadbirlar dasturi" ishlab chiqilgan. Mazkur dastur tizim korxonalarida faoliyat yuritayotgan yoshlarning huquq va manfaatlari himoyasi, professional kasb mahoratlarini oshirish, bo‘sh vaqtlarini mazmunli tashkil etish, yosh rahbar kadrlarni tarbiyalash va ularning zaxirasini yaratish kabi qator dolzarb masalalarni o‘z ichiga olgan.

Soha mutaxassislari va olimlar hamkorligida unni inson organizmi uchun zarur bo‘lgan darmondorilar va vitaminlar bilan yanada boyitish choralari ko‘rilmoqda.

– «Non mahsulotlarini ishlab chiqarishda mahalliy meva-sabazvot kukunlaridan foydalanish va texnologiya jarayonlarini takomillashtirish» yo‘nalishida izlanishlar olib borayapmiz, – deydi Toshkent kimyo-texnologiya instituti o‘qituvchisi Gulnoza Jahongirova. – Maqsadimiz – biologik faol qo‘shimchalar bilan boyitilgan va sog‘lom ovqatlanishga mos mahsulotlarni ko‘paytirish. Olma, sabzi, qovoq, qizil shirin qalampir hamda lavlagi kukunining texnologik jarayonga ta’sirini o‘rgandik. Buning uchun patent oldik.

Bugungi kunda mazkur yangilik «Toshkentnon» uyushmasi tizimidagi korxonalarda joriy etilib, iste’molchilarga turli meva va sabzavotlar ta’mi kiritilgan non mahsulotlari yetkazib berilmoqda.

Davra suhbatida "O‘zdonmahsulot" aksiyadorlik kompaniyasi tizimidagi yoshlarning tashabbuskorligi, yangiliklarga, yaratuvchanlikka bo‘lgan intilishlari, yangi g‘oya va maqsadlarni amalga oshirish yo‘lidagi harakatlari soha rivojida qo‘l kelayotgani haqida so‘z yuritildi.
/ Manba: O‘zA / Ko'rishlar: 6

So’rov

Bizning saytimiz sizga yoqdimi?
Belgilangan matnni tinglash uchun quyidagi tugmani bosing Powered by GSpeech